საპილოტე რეგიონების ინტეგრირებული განვითარების პროგრამის ფარგლებში, GITA - ს საგრანტო პროგრამების გამარჯვებულები გამოვლინდნენ
საქართველოს ინოვაციების და ტექნოლოგიების სააგენტოს 30 000 ლარიანი და 100 000 ლარიანი საგრანტო პროგრამების გამარჯვებულები იმერეთისა და რაჭა-ლეჩხუმის რეგიონში გამოვლინდნენ. პროგრამა ევროკავშირის საგრანტო დაფინანსებით, „2020-2022 წლების საპილოტე რეგიონების ინტეგრირებული განვითარების პროგრამის“ ფარგლებში საქართველოს ოთხ რეგიონში (იმერეთი, კახეთი, გურია, რაჭა-ლეჩხუმი-ქვემო სვანეთი) ხორციელდება.
30 000 ლარიან საგრანტო კონკურსში გამარჯვებულები პროექტები რაჭა-ლეჩხუმსა და ქვემო სვანეთში:
- Web პლატფორმა Racha With Love - რეგიონული მასშტაბის ტურისტული და სხვა სერვისების, ღირსშესანიშნაობებისა და ტურისტული ობიექტების ერთ სივრცეში გაერთიანება
- ComicsLand - კომიქსების შექმნის ვებ პლატფორმა, სადაც მომხმარებელი აგებს კომიქსის სიუჟეტს არსებული ილუსტრაციებით. მომხმარებლების სურვილის შესაბამისად იქმნება კომიქსის პერსონაჟები რეალური ადამიანების მოდელირებით.
100 000 ლარიან საგრანტო კონკურსში გამარჯვებული პროექტები რაჭა-ლეჩხუმსა და ქვემო სვანეთში:
თაფლი ლეჩხუმიდან - მეფუტკრეობის ცოდნის გამზიარებელი საწარმო, ასევე თაფლის გადამუშავების, დაფასოების (სტანდარტების დაცვით), კრემირებისა და ფიჭის დაბეჭდვის სერვისები.
30 000 ლარიან საგრანტო კონკურსში გამარჯვებულები პროექტები იმერეთში:
ბაია ფუდი (ზესტაფონი) - ადგილობრივი ნედლეულით დამზადებული ხილის, ჩირისა და შოკოლადის წასახემსებელი „სნეკის“, ახალი ქართული დესერტის წარმოება ქიმიური დანამატებისა და კონსერვანტების გარეშე;
100 000 ლარიან საგრანტო კონკურსში გამარჯვებული პროექტები იმერეთში:
- პირველი ქართული 3D პრინტერის წარმოება (ქუთაისი) - ანრი ყუფარაძე და აფხაზეთის მთავრობის საკუთრებაში არსებულ სსიპ "ბიზნეს ინკუბატორის" გუნდი;
- DGSystems - და ვინჩის მწვანე სისტემები - პლანეტარული ტიპის ტრანსფორმირებადი სასათბურე სისტემა სასარგებლო ფართის 100% ათვისების სისტემით ვეგეტაციური პროცესების შეზღუდვის გარეშე და გაუმჯობესებული აგროტექნიკური შესაძლებლობებით. აღნიშნული ტექნოლოგია აქტიურად დაინერგება იმერეთის რეგიონში არსებული სასათბურე მეურნეობებში, რაც გაზრდის მათ ხარჯ-ეფექტურობასა და კონკურენტუნარიანობას.
- soplidan.ge (ქუთაისი) - ელექტრონული კომერციის პლატფორმა, რომელიც იმერეთის ფერმერებსაც პირდაპირ დააკავშირებს ადგილობრივ მოსახლეობასთან ვებ-გვერდის საშუალებით;
- ტყის გაყინული სოკოები (ხარაგაული) - ინოვაციური ბიზნეს მოდელით, ქვეყანაში გამოუყენებელი ტონობით ტყის რესურსებით შეიქმნება ახალი პროდუქტი ადგილობრივი და საექსპორტო ბაზრებისთვის;
- Q-bic (ქუთაისი) - მაღალი ხარისხის და ხელმისაწვდომი ფასით Glamping-ის კარვების წარმოება და გაყიდვა ადგილობრივ და საერთაშორისო ბაზრებზე და ამით აუთვისებელი მიწების შემოსავლის წყაროდ ქცევა მფლობელებისთვის;
- ხილისა და ბოსტნეულის გადამუშავება (ს. დიმი, ბაღდათი) - შპს ვაზის პროდუქტების კომპანია ტიბარენი - მოძრავი გადამამუშავებელი საწარმოს მეშვეობით წვენების, ჯემების, საწებლების წარმოება, სრულიად ახალი სტანდარტის პროდუქციის შეთავაზება ადგილობრივი ნედლეულით და საექსპორტო და ადგილობრივი პოტენციალის ათვისება. ამასთან, დამატებითი შესაძლებლობა ადგილობრივი ფერმერებისთვის, ეზოდან გაუსვლელად, მეტად მისაღები პირობებით მოახდინონ პროდუქციის ჩაბარება.
- ჰერბია (წყალტუბო) - ახალი დამატებითი პროდუქტების წარმოება - მწვანილის, ბოსტნეულის სალათების, წვნიანი კერძების ინგრედიენტების გადამუშავება და შეფუთვა საჭმელად და მოსამზადებლად მზა სახით.
ერთიანი რეგიონული განვითარების პოლიტიკისა და ევროკავშირის ტერიტორიული დაგეგმვის უახლესი მიდგომების შესაბამისად, პროექტის მიზანია, რეგიონული სამეწარმეო ინოვაციური ეკოსისტემის განვითარება, ინოვაციური საწარმოების შექმნის სტიმულირება და ჩართვა ქვეყნის ეკონომიკაში.
აღნიშნული პროგრამა მოიცავდა ორი კატეგორიის საგრანტო პროგრამას:
· მცირე გრანტი 30 000 ლარის ოდენობით, რომლის მიზანია ინოვაციების დანერგვა, ტესტირება ან გაუმჯობესება მათი შემდგომი კომერციალიზაციისთვის. ინოვაციებით და ტექნოლოგიებით დაინტერესებული სუბიექტების საერთაშორისო ტექნოლოგიურ და ინოვაციურ ეკოსისტემაში ინტეგრაცია და მათი კომერციული პოტენციალის გაზრდა.
· ინოვაციური მეწარმეობის გრანტი 100 000 ლარის ოდენობით, რომლის მიზანია ინოვაციური ან/და ტექნოლოგიური ელემენტის შემცველი და კომერციალიზაციის მაღალი პოტენციალის მქონე ბიზნეს პროექტების დაფინანსება.
